JK Grosshöchstette leite ig sit 2001. Immer am Donnschtig Abe hei mir im Rest. Pintli z Grosshöchstette Prob u üebe dert uf üsers Adväntskonzärt wo am erscht Adväntswucheänd im Dezember i dr Chilche Grosshöchstette am Wiehnachtsmärit stattfindet oder uf üsers Konzärt hi wo de grad druf im Jänner ir Merzwäckhalle z Obergoldbach isch!

Mir trätte aube o uf u hei würklech dr Fride zäme. E guete Hufe mit Junge u jung blibne Manne u minere Wenigkeit! :)


JK Schüpbach leite ig sit 2011. Es si gmögegi Mönsche i däm Schüpbach. Lüt wo eim a ds Härz wachse. Mir üebe geng am Mäntig em Abe im Chrüz ds Schüpbach u hei meischtens fröhlechi Probe. Es isch geng e huufe ds schaffe aber es klingt immer sicherer u das isch e Fröid eso ds wärche. Das schetze i bi de Schüpbechler eso!

 


Ds Sunnechörli ha ig 1995 gholfe gründe u immer mitgsunge u gjutzet. vo 1998 hani o Aktiv gholfe leite. Ds Sunnechörli isch öppis speziells, mir üebe nid all Wuche wie anderi Klubs u si eigentlech o süsch nid e Verein. Mir hei ke Presidänt u kener Statute...ja es isch viles echli anders, aber eis isch sehr usgeprägt. Mir si mitenand verchnüpft u verbunde wie nes Band u luege u gschpüre zu- und mitenand und das isches wahrschinlech, wo üs so speziell macht. Es spieglet sich im Gsang wider. Mir passe eifach zäme u das isch es schöns Gfüehl eso es Hüfeli z dirigiere!

Ds Familiequartett Schafroth- Hofer singt u musiiert sit em 2016 zäme.

E schöni Konstellation mit herrleche Stimme.