Mi Name isch Miriam Schafroth-Brog u i bi am 2. Auguscht 1968 z`Geissholz /Meiringe gebore worde. I bi mit 4 Gschwüschterti ufgwachse u mir si scho als chlin mit üsem Bruchtum oder mit andere künschtlerische Tätigkeite i berüehrig cho. I d Schuel bi i ds Geissholz u z Willige.

Scho als chliises Meitschi ha i mit mim Mueti u er Schweschter Christine gsunge u mir hei mänge schöne Uftritt dörfe mache zäme.

Speeter wo i de meh mit der Chrischtine Duett gsunge ha, hei üs aber üser Eltere fasch immer begleitet und unterstützt! E bsundere Uftritt hani einisch mit 11i gha, won i bir Fernsehsändig: Stubete mit em Dieter Wysmann, ha dörfe ufträtte, Solo u mit dr Kapälle Burgalp.

Scho mit 15ni bin i em Rat vo Adolf Stähli gfolgt u i BKJV iträtte u ungerdessi bini mit 40gi scho Veteran worde! 1985 hani mis Erschte Jodlerfescht beschtritte. Nume nid gsprängt vo Adolf Stähli hani gsunge u es "sehr guet" übercho. E Wäutsfröid hani u mi Begleiter dr Gery Ernst gha!

Dr Dirigäntekurs hani 1990 bi Hanspeter Seiler bsuecht u ds Praktikum bi Chlous Rubin. Lang bin i Kursjodlere gsi bim Chlous Rubin u 1993 hani sälber dr Kursleiter gmacht.

Mi Usbildig zur Jurorin isch vo 2003-2005 gange u ds erschte Jodlerfescht als vollwärtegi Jurorin han i 2005 z`Aarau bestritte. 2012 hani due ono dr Juryobmannkurs erfolgrich absolviert und amte jetz a de Jodlerfescht als Obfrou im Juryteam. Am 1. Oktober 1994 han i dr Peter Schafroth vo Stalden ghüratet u mir hei zwöi flotti Buebe übercho. Dr Adrian 1995 u dr Michael 1998.

Weni nid grad am jutze bi hätti ono angeri Inträsse. I lose sehr gärn o angeri Richtige Musig z. B. Klassisch oder was es grad Nöis ufem Märit het…solang das es no nach Musig tönt… i schribe gärn Briefe oder Gedicht, ha sälber o Gedichtbändli veröffentlicht, baschtle öppe für miner Gotteching u komponiere Lieder.

Bis jetz si 47 Lieder us miner Fädere entstande u es fröit mi geng, we se öpper o singt! Scho woni chlin bi gsi, hani geng vom Vreni Kneubühl u em Heidi Kohler gschwärmt u ihne alles probiert nachezmache woni uf de Tonbängli ha ghört! Bis hüt so die zwo Froue miner grosse Vorbilder blibe. Weni eso die Komponischte düregah, hani sicher es paar Vorbilder. Unverglichlechi Kompositione het dr Adolf Stähli gha, si Text u d Melodie, immer hervorragend durchdacht u es seit alles us wo me wett…sött u mues wüsse. Wunderbar!

Der Chlous Rubin mit sine wärschafte Jütz , wo mir zum Teil i Hals gschribe si, das isch e Teil vo mir. Paul Müller Egger, isch o e Name, e Komponischt wo`s gschafft het, alles wunderbar kompakt la z`klinge, die ganzi Melodie, e Harmonie, eifach e Ohreschmus! Ja i chönnt no mänge ufzelle.. Vor Art här beschribe i mi eigentlech als e gsellige Mönsch. I gniesse z zämesy mit guete Fründe u i bi fasch nie i ds Bett z übercho. I bi e völlige Nachtmönsch, u will i am Morge ring ufstah bruche äbe glich sehr wenig Schlaf. I gwüssne Sache bi i sehr zielschträbig u verbisse.

I de Probe de öppe schträng, aber im zwöite Teil ume chli weniger. I finges wichtig ufenang z luege u we öpper Sorge het, o einisch es Ohr zha derfür u villech geits de chli ringer sälb zwöit z trage! Sit 1998 dirigiere u jutze i im Sunnechörli Zämewürfliwil u de hani im Jahr 2000 dr JK Grosshöchstette übernoh. Dert dirigiere u jutze i o bis hüt u es gfallt mer sehr! 2011 hani e nöii Herusforderig agno, dr JK Schüpbach. Dert dirigiere i u gibe alles.

O diversi Chlinformatione si unger minere Leitig u da singe u jutze mer grad so wies üs fröit.