CD "Eso Momänte"

Das isch d CD vom Sunnechörli. Es isch e Rückblick uf 20 Jahr Sunnechörlizyt

u es Dokumänt vo üsere Arbeit. Speziell ume e Ufnahm mit dr Kapälle Thürler, Mosimann, Dänzer...ds Wolgalied! E schöne Tontreger mit e huufe Abwächslig!

Disers isch mi Erschti Eigeti CD, e Tontreger mit e hufe

Gfüehl u Hoffnig. Usegäh hani die im 2005.

E schöni Erfahrig isch es gsi, dass i mit

so viune liebe Mönsche dä Tontreger ha dörfe realisiere.

I bi dankbar für die Zyt, es het mi über so viles treit! 

Das isch mi Zwöiti Eigeti CD wo i im 2008 ha usegäh!

Dennzumal wie hüt. Mit allne Mönsche wo mi denn uf

mim Wäg hei begleitet u mi irgend öppis verbunde het!

E gfröiti Sach, wien i hüt immer no meine!

Das isch se jetze, mini NÖISCHtI...mini Dritti Eigeti CD, mit

no meh Gfüehl u Emotione! Ja wahrlech e Sunneschtrahl!

Im Dezember 2013 hei mir dä Tontreger us der Toufi ghobe

u es isch für mi grad so speziell, will i disersmau würklech

öppis wie es eigets Ching vo mir i d Wält la klinge.

Mit 13 Nöikompositione isch die CD zum gröschte Teil vo

minere Musig bespilt u es isch e Ehr das o disersmal miner

Lüt um mi um hei mitghulfe, das es äbe eso isch

usecho...i ha e WÄLTSFRÖID!!

Sunnechörli CD, ja scho lang isch es här...:) da simer no jung gsi

u hei möge jutze u singe. Das isch ds Sunnechörli no ir ganz "alte"

Bsetzig, ungerdessi hei d Chöpf afe chli gänderet oder si elter worde ;)

aber singe u jutze tüe mer no...voller Fröide!! Scho gli ume isch e nöii

CD da! Aber o disi lose i gärn aube ume!

Ds Liederbüechli isch für Chlinformatione vo Solo bis

Quartett geignet.

Di Partiture wo unger ufglischtet si chöiter bi mir bsteue.

I fröiemi sehr we dir miner Lieder zum beschtä gäbit.

E jedem isch sis Wägli vorgseh,

mi cha o nüt drann dräje.

Am gschidschte isch`s, mi lahts la gscheh,

z churz Gras chaisch nümme mäje.......

eso faht z`erschte Gedicht a, vo mim erschte Büechli woni churz

nachem Tod vo mim geliebte Drätti ha usegäh. Es isch öppis, wie es

Tagebuech, e Barometer , wies eim cha ga im Läbe mit Verluschte,

eigeter Chrankheit, Verzwiflig u glich ume Hoffnig!

I wünsche dir e Tag voll Sunneschyn,

dass die trüebe Stunge blibe chlin.

Es fründlechs Wort, e liebe Blick,

es härzlechs Lache u Händ mit Gschick.

ja...wär het ne nid DÄ Wunsch....viu Gäud z ha, es nöis Auto

e Villa am Strand u e huufe Ross...e Million jaja...es gäbti da e hufe

ufzzeue! I mim zwöite Büechli schribe i, was i eso würdi wünsche u

merke, dass es eigentlech nume ei Wunsch git, nämlech ...gsung ds sy!

"Mi Hoffnig" eifach u so schlicht,

verzellt gar mängi schöni Gschicht.

Vo Heiwehschmärz, Erläbnis, Zyt,

o Wiehnachtswunder si nid wyt.

Lueg jede Tag zum Fänschter us

s`ergit di Hoffnigsbluemeschtruss.

hoffnigsvolls, bsinnlechs u mängisch voll Längizytigs, chame i däm

Büechli läse. Churzgschichtli usem Läbe griffe, Gedichtli für alli

Läbeslage... all das findet me i däm, mim letschte Büechli!

Bsundrig isches o usecho u we alles klappt....so isches nid mis

letschte gsi!! :)